کراچی:
سندھ مدرستہ الاسلام یونیورسٹی نے UI گرین میٹرک ورلڈ یونیورسٹی رینکنگ 2024 میں سندھ کی صوبائی پبلک سیکٹر یونیورسٹیوں میں 4 ویں نمبر پر شاندار درجہ بندی حاصل کی ہے۔ جبکہ ملک میں یہ 43 ویں نمبر پر ہے اور 863 یونیورسٹیوں/ اداروں کی عالمی درجہ بندی پر ایشیائی ممالک میں 480 ویں نمبر پر ہے۔
سندھ مدرستہ الاسلام یونیورسٹی نے مذکورہ کامیابی یونیورسٹی کے وائس چانسلر ڈاکٹر مجیب صحرائی کی رہنمائی میں حاصل کی ہے، جن کی قیادت نے ادارے کو اس عالمی پہچان کی طرف لے جانے میں اہم کردار ادا کیا ہے۔ درجہ بندی کے عمل کی نگرانی مہران یونیورسٹی آف انجینئرنگ اینڈ ٹیکنالوجی کے سابق وائس چانسلر پروفیسر ڈاکٹر اسلم عقیلی نے کی، جنہوں نے اس بات کو یقینی بنایا کہ جمع کرانے سے پہلے تمام ڈیٹا کا اچھی طرح سے جائزہ لیا جائے۔
سندھ مدرستہ الاسلام یونیورسٹی کے پیشہ ور افراد کی ایک ٹیم جس میں ڈاکٹر منصور احمد کھڑو، ڈائریکٹر آفس آف ریسرچ، انوویشن اینڈ کمرشلائزیشن اور ڈاکٹر صائمہ بیگ، ڈائریکٹر کوالٹی انہانسمنٹ سیل نے ضروری ڈیٹا اکٹھا کرنے میں کلیدی کردار ادا کیا۔ درجہ بندی کے لیے ڈاکٹر حنا شہناز، ایس ایم آئی یو کے شعبہ ماحولیاتی سائنسز کی اسسٹنٹ پروفیسر نے بھی اپنی مہارت فراہم کی، جس سے مطلوبہ معلومات کی تصدیق کو یقینی بنایا گیا۔
یہ کامیابی ایس ایم آئی یونیورسٹی کی پائیداری اور ماحولیاتی ذمہ داری کے عزم کو اجاگر کرتی ہے، جو خطے اور عالمی سطح پر سبز طریقوں اور تحقیق میں رہنما بننے کے سفر میں ایک اہم سنگ میل ہے۔
