ڪراچي سنڌ جي سينيئر وزير شرجيل انعام ميمڻ چيو آهي ته سنڌ حڪومت روزگار جا نوان موقعا پيدا ڪرڻ لاءِ ڪوششون ڪري رهي آهي. اڄ اسان جي عالمي سيڙپڪارن سان ملاقات ٿي، جن زراعت، صحت، ٽرانسپورٽ ۽ توانائي جي شعبن ۾ سيڙپڪاري ڪرڻ ۾ دلچسپي ڏيکاري آهي. صحت جي شعبي ۾ اسان ڪراچي ۾ هڪ هيلٿ سٽي ٺاهڻ جي منصوبابندي ڪري رهيا آهيون، جنهن ۾ تحقيقاتي ليبارٽريون ۽ طبي سامان ۽ ٻيون شيون ٺهنديون. سيڙپڪارن صرف ميڊيڪل شعبي ۾ هڪ ارب ڊالر جي سيڙپڪاري ڪرڻ ۽ ڌاٻيجي اڪنامڪ زون ۾ زمين خريد ڪرڻ ۽ صنعت لڳائڻ ۾ دلچسپي ڏيکاري آهي، جنهن سان پنجاهه هزار مقامي ماڻهن کي نوڪريون ملنديون. ڪراچي ۾ پريس ڪانفرنس کي خطاب ڪندي سنڌ جي سينيئر وزير ۽ اطلاعات ، ٽرانسپورٽ، ۽ ماس ٽرانزٽ واري صوبائي وزير شرجيل انعام ميمڻ چيو ته ڪيترو به ناڪاري پروپيگنڊا ڪيو وڃي يا سازشون ڪيون وڃن، عالمي سيڙپڪار اڃا تائين پاڪستان ۾ سيڙپڪاري ڪرڻ ۾ دلچسپي رکن ٿا. سازشن جي باوجود، بين الاقوامي واپاري اڄ به حڪومت تي اعتماد ڪن ٿا ۽ مختلف شعبن ۾ سيڙپڪاري لاءِ تيار آهن. هن چيو ته غير ملڪي سيڙپڪار زراعت جي شعبي ۾ به سيڙپڪاري ڪرڻ چاهين ٿا. هتي ڀاڻ، ٻج ۽ ٻين شين جا اگهه تمام گهڻا آهن ۽ ٽيوب ويلز جا به خرچ آهن. اسان چاهيون ٿا ته اسان جي پيداوار ٻين قومن جيان وڌيڪ ٿئي. سنڌ حڪومت سڀني شعبن سان تعلق رکندڙ ماڻهن لاءِ ڪم ڪري رهي آهي. اسان سوچ ويچار سان سيڙپڪارن کي هتي اچڻ ۽ سيڙپڪاري ڪرڻ جي دعوت ڏني آهي. غير ملڪي سيڙپڪار توانائي جي شعبي ۾ به سيڙپڪاري ڪرڻ ۾ گهڻي دلچسپي رکن ٿا. هتي ڪوئلي ۽ ونڊ پاور جنريشن پلانٽ سان بجلي پيدا ڪئي پئي وڃي. هن وقت سڀ کان وڌيڪ بجلي ڪوئلي سان پيدا ٿي سگهي ٿي ۽ ڪوئلو سڀ کان وڌيڪ ٿر ۾ موجود آهي. سينيئر وزير شرجيل انعام ميمڻ چيو ته غير ملڪي سيڙپڪارن ٽرانسپورٽ جي شعبي ۾ به سيڙپڪاري ڪرڻ جي دلچسپي جواظهار ڪيوآهي . ان سلسلي ۾ سيڙپڪارن سان گڏجاڻين جو سلسلو جاري آهي ۽ ان سلسلي ۾ سڀاڻي اڱاري تي به هڪ اجلاس ٿيندو. اسان چاهيون ٿا ته اهي گڏجاڻيون ڪامياب ۽ عام عوام، ملڪ، قوم، ۽ صوبي سنڌ لاءِ نتيجي واريون ثابت ٿين. ٽرانسپورٽ جي شعبي ۾ اسان جي اولين ترجيح ڪراچي سرڪلر ريلوي آهي. ان کان اڳ اسان جي دنيا جي سڀ کان وڏي ٽرانسپورٽ ڪمپني يوٽونگ سان ڪراچي ۾ پلانٽ لڳائڻ بابت ڳالهه ٻولهه ٿي هئي، جيئن بسون هتي ٺهن ۽ ماڻهن لاءِ روزگار جا موقعا پيدا ٿي سگهن. هن چيو ته اسان چاهيون ٿا ته هتي بلٽ ٽرينز هلن، ڪراچي کان سکر تائين بلٽ ٽرين هلي ۽ ماڻهن جو سفر آسان ۽ سستو ٿئي ۽ ماڻهن جو وقت بچي. اڄ اسان سيڙپڪارن سان بلٽ ٽرين بابت به ڳالهه ٻولهه ڪئي. سينيئر وزير شرجيل انعام ميمڻ چيو ته مون سيڙپڪارن کي چيو آهي ته هو ٻه مرحلن ۾ بلٽ ٽرين شروع ڪن، پهرين مرحلي ۾ ڪراچي کان حيدرآباد ۽ ٻئي مرحلي ۾ ڪراچي کان سکر تائين بلٽ ٽرين شروع ڪن. پاڪستان ۾ سيڙپڪاري جا تمام گهڻا موقعا آهن، پر بدقسمتي سان اسان جون ترجيحات ڪجهه ٻيون آهن. هن چيو ته موٽر وهيڪل فٽنيس جي قانون جي حوالي سان پاڪستان جي وفاق ۽ چئن صوبن جي حڪومتن اهو ڪردار ادا نه ڪيو جيڪو انهن کي ڪرڻ گهرجي ها. هاڻي اسان گاڏين جي فٽنيس جي حوالي سان مضبوط بنيادن تي ڪم ڪرڻ وارا آهيون. فٽنيس جي حوالي سان ٻن قسمن جي مڪينزم تي غور ڪيو پيو وڃي ته يا ان کي پبلڪ پرائيويٽ پارٽنرشپ تي هلائي وڃي يا جن گروپن وٽ فٽنيس جي مشينري موجود آهي، انهن کي آؤٽ سورس ڪيو وڃي. سنڌ حڪومت ٻنهي آپشنز تي غور ڪري رهي آهي. پهرين فٽنيس چيڪنگ لاءِ ٻه انسپيڪٽر هئا، هاڻي ٻاويهه آهن، ۽ اهي به لکين گاڏين جي فٽنيس چيڪ ڪرڻ لاءِ ناڪافي آهن. هن چيو ته صاف سٿري ماحول ۾ ساهه کڻڻ ماڻهن جو حق آهي، عوام کي اهو حق فراهم ڪرڻ حڪومت جي ذميواري آهي. جلد ئي اسان هڪ سٺي حل سان سامهون اينداسين. سڀ کان پهرين سڀني سرڪاري گاڏين جي سو سيڪڙو فٽنيس يقيني بڻائي ويندي، ان کان پوءِ پبلڪ ۽ پرائيويٽ ٽرانسپورٽ جي فٽنيس يقيني بڻائي ويندي. سينيئر وزير شرجيل انعام ميمڻ چيو ته پيپلز بس سروس جا وڌيڪ چاليهه بس اسٽاپ ڪراچي ۾ ٺاهيا پيا وڃن، جيئن عوام کي تڪليف کان بچائي سگھجي. منهنجي عوام کان درخواست آهي ته هو بس عملي کي تنگ نه ڪن، بس صرف بس اسٽاپ تي ئي بيهندي. هن چيو ته آرٽ هڪ وڏو شعبو آهي. اسان جي ملڪ ۾ سينما گهر بند ٿي رهيا آهن ۽ باصلاحيت ماڻهن کي پنهنجي صلاحيتن جو مظاهرو ڪرڻ جو موقعو نه پيو ملي. سنڌ حڪومت جي اطلاعات کاتي هڪ بورڊ جوڙيو آهي، جنهن تحت نون ماڻهن کي فن جي شعبي ۾ موقعا فراهم ڪيا ويندا، جيئن هو ماڻهن ۾ سٺين شين جو بيان ٺاهي سگهن. سنڌ حڪومت مثبت سوچ ڏانهن وٺي وڃڻ لاءِ سرگرم طريقي سان ڪم ڪري رهي آهي. سينيئر وزير شرجيل انعام ميمڻ چيو ته سنڌ حڪومت پاران اسڪولن ۾ مخصوص ٻارن لاءِ مخصوص ڪوٽا رکي پئي وڃي. سڀني اسڪولن ۾ مخصوص ٻارن کي داخلا ملندي ۽ انهن کي عام ٻارن سان گڏ رکيو ويندو. اسان سڀني جي ذميواري آهي ته اسين سٺا انسان ٿي هڪٻئي جي خدمت ڪري سگهون. هن چيو ته سنڌ پيپلز رورل سوڪ سروسز جو قيام سنڌ حڪومت پاران عمل ۾ آندو ويو آهي، جنهن تحت ڳوٺاڻن علائقن ۾ رهندڙ 61 سيڪڙو آبادي کي پيئڻ جو صاف پاڻي ۽ صفائي سٿرائي جي سهولتن لاءِ ڪم ڪيو ويندو. چيئرمين بلاول ڀٽو زرداري جو سڀ کان اهم مقصد اهو آهي ته شهري ۽ ڳوٺاڻن علائقن ۾ ماڻهن کي پيئڻ جو صاف پاڻي فراهم ڪيو وڃي. هن ملڪ ۽ معاشري ۾ سڀ مسئلا اهم آهن، اسان سڀني کي انهن مسئلن جي حل ۽ معاشري کي بهتر بڻائڻ لاءِ ڪردار ادا ڪرڻو پوندو. هڪ سوال جي جواب ۾ سينيئر وزير شرجيل انعام ميمڻ چيو ته پي ٽي آئي جي باني اڄ تائين پاڪستان کي نقصان پهچائڻ جا جيڪي ڪرتوت ڪيا آهن، اهي سندس پنهنجي خواهش نه هوندي. ڪٿان کان کيس هدايتون ملنديون آهن. هو هر اهو ڪم ڪندو جيڪو پاڪستان کي نقصان پهچائي سگهي. ڌرڻي دوران عمران خان سول نافرماني جي تحريڪ هلائي ۽ ماڻهن کي اُڪسايو ته هو رقم موڪلڻ لاءِ بينڪنگ چينلز استعمال ڪرڻ بدران مني لانڊرنگ ڪن. هن بجلي جو بل ڦاڙي ڇڏيو ۽ ماڻهن کي اُڪسايو ته بجلي جو بل نه ڀرين ۽ پاڪستان جو نقصان ڪن. هن چيو ته هي حڪومت جو نه پر عوام جو نقصان آهي. جيڪو پئسو ڌرڻي تي خرچ ٿي رهيو آهي، اهو ڪنهن به فلاحي ڪم ۾ لڳائي سگهجي ٿو. ملڪ کي بند ڪرڻ، اسٽاڪ ايڪسچينج تي دٻاءُ وجهڻ، ڪاروباري حلقن، بين الاقوامي سيڙپڪارن تي دٻاءُ وجهڻ هڪ سازش آهي. سينيئر وزير شرجيل انعام ميمڻ چيو ته پي ٽي آئي جي باني طرفان ڊفينس پراڊڪٽس جو بائيڪاٽ به ڪنهن ٻئي جي خواهش تي ڪرايو پيو وڃي. پي ٽي آئي جو باني نٿو چاهي ته ڪو ادارو مضبوط ٿئي. پي ٽي آئي جي باني پهرين ادارن جو چهرو بگاڙڻ، انهن کي سياسي بڻائڻ جي ڪوشش ڪئي، ان خلاف سوشل ميڊيا تي زهر اڳاڇيو. هن چيو ته پي ٽي آئي جو باني پاڪستان جي هر ادارن خلاف آهي. حوالا هُنڊي ذريعي بينڪن کي، بجلي جو بل نه ڀري واپڊا کي نقصان پهچائڻ جون ڳالهيون ڪيون. هاڻي سول نافرماني جي نالي تي ڊفينس پراڊڪٽس جو بائيڪاٽ ڪري رهيو آهي. هو هر ادارو ٽارگيٽ ڪرڻ ٿو چاهي. عمران خان جو ٽارگيٽ نه ادارو آهي، نه سياستدان آهي، پر پاڪستان آهي. هو پاڪستان کي ٽارگيٽ ڪري، پاڪستان کي نقصان پهچائڻ ٿو چاهي. هڪ سوال جي جواب ۾ سينيئر وزير شرجيل انعام ميمڻ چيو ته جيڪڏهن فيصل واوڊا ڪجهه چيو آهي، ته هو ڄاڻي ٿو. هو هڪ سينيٽر آهي، سٺو ماڻهو آهي ۽ سٺي سياست ڪري رهيو آهي. جيڪڏهن هو ڪنهن سان ملندو آهي، ته هو ملندو آهي. هڪ سوال جي جواب ۾ سينيئر وزير شرجيل انعام ميمڻ چيو ته جيڪڏهن مولانا فضل الرحمان جي ڪا ڳڻتي آهي، ته هو حڪومت سان ڳالهيون ڪري سگهي ٿو. حڪومت جو ڪم بل ٺاهڻ ۽ منظور ڪرڻ آهي. هڪ سوال جي جواب ۾ هن چيو ته جنهن ڏينهن اسين نئين مڪينزم سان گاڏين جي فٽنيس شروع ڪنداسين، ته گهر ويٺي فٽنيس نه ٿيندي. جنهن جي به گاڏي هوندي، اها مرڪز ۾ ويندي ۽ ان جي فٽنيس چيڪ ڪئي ويندي. هن چيو ته پاڪستان پيپلز پارٽي پاڪستان ۾ بهترين سيڙپڪاري ماحول فراهم ڪيو آهي. اڄ به سيڙپڪار پاڪستان پيپلز پارٽي جي سنڌ حڪومت تي اعتماد ڪن ٿا. هڪ سوال جي جواب ۾ سينيئر وزير شرجيل انعام ميمڻ چيو ته پاڪستان جي وزيراعظم ٿيڻ لاءِ سڀ کان پختو، پڙهيل، ۽ نوجوان شخص، چيئرمين بلاول ڀٽو زرداري آهي. هو نوجوان آهي، کيس پرڏيهي وزير طور تجربو آهي ۽ ملڪ مان نفرت جي سياست کان ختم ڪري، پاڪستان کي متحد ڪرڻ جي سياسي بصيرت آهي. بلاول ڀٽو جو نئون نظريو پاڪستان لاءِ سٺو آهي ۽ پاڪستان لاءِ فائديمند آهي، ته هو جلد کان جلد وزيراعظم بڻجي.
