ڪراچي سنڌ جي وڏي وزير سيد مراد علي شاھھ چيو آھي تھ وفاقي حڪومت يا آءِ ايم ايف سندس اين ايف سي ايوارڊ يا 18ھين ترميم بابت ڪابھ ڳالھھ ناھي ڪئي. ان جي ابتڙ وفاقي حڪومت ڪجھھ وزارتون ختم ڪري 18ھين ترميم تي عملدرآمد شروع ڪيو آھي. وڏي وزير مقامي ھوٽل ۾ ورلڊ بينڪ جي سائوٿ ايشيا ڊولپمينٽ اپڊيٽ ۽ پاڪستان ڊولپمينٽ اپڊيٽ جي آڪٽوبر 2024ع واري شماري جي جاري ٿيڻ واري تقريب کي خطاب ڪرڻ کانپوءِ ميڊيا سان ڳالھائيندي ڪئي. سيد مراد علي شاھ وڌيڪ چيو تھ ڪجھ مامرن تي سندس حڪومت کي خدشا آھن جن جي حل لاءِ وفاقي حڪومت سان ڳالھھ ٻول جاري آھي. پاڪستان پيپلز پارٽي رڳو انھيءَ عمل جي حمايت ڪندي جيڪي ملڪي مفاد ۾ ھوندا. ھڪ سوال جي جواب ۾ وڏي وزير چيو تھ سندس اڄ صبح اخبار ۾ پڙھيو آھي تھ وفاقي حڪومت پنجن آءِ پي پيز سان بجلي جي خريداري جا معاهدا ختم ڪري ڇڏيا آهن، جنهن سان بجلي جي قيمتن ۾ گهٽتائي ٿيندي. سيد مراد علي شاهه چيو ته هن اڳ ۾ تجويز ڏني هئي ته حڪومت کي اضافي بجلي فراهم ڪرڻ لاءِ اپاءِ وٺڻ گهرجن. اهي صنعتون جيڪي 8 ڪلاڪن جي نارمل شفٽ کانسواءِ رات جي شفٽ شروع ڪن ٿيون، انهن کي سستي اگهه تي بجلي فراهم ڪئي وڃي. جنهن سان بيروزگارن لاءِ روزگار جا موقعا پيدا ٿيندا، پيداوار ۾ بهتري ايندي ۽ وفاقي حڪومت پاران آءِ پي پيز کي ادا ڪيل ڪيپسٽي چارجز پ۾ ڪم ايندا. هاڻي ٻڌو اٿم ته وفاقي حڪومت سياري ۾ اسان جي تجويز تي عمل ڪرڻ جو فيصلو ڪيو آهي. ان کان پھرين ورلڊ بينڪ جي سائوٿ ايشيا اينڊ پاڪستان ڊولپمينٽ اپڊيٽ 2024ع جي لانچنگ تقريب کي خطاب ڪندي وڏي وزير چيو ته رپورٽ ۾ پاڪستان ۽ ڏکڻ ايشيا کي درپيش معاشي چئلينجز جا اهم تفصيل پيش ڪيا ويا آهن. رپورٽ پائيدار ترقي لاءِ روڊ ميپ جي طور حيثيت رکي ٿي. سيد مراد علي شاهه چيو ته 2022ع جي تباھھ ڪندڙ برساتن سبب صوبي جو 70 سيڪڙو حصو پاڻي هيٺ اچي ويو ھو. انفراسٽرڪچر تباهه ٿي ويو. ڪووڊ-19 سبب پھرئين سستي جو شڪار ترقي وارو عمل وڌيڪ رڪجي ويو. ان جي باوجود سنڌ حڪومت انفراسٽرڪچر بحال ڪري صوبي جي عوام کي درپيش معاشي مسئلا حل ڪيا. هن چيو ته اسان مشڪلاتن کي منهن ڏيڻ لاءِ پرعزم آهيون ۽ سنڌ جي عوام اسان تي مڪمل اعتماد جو اظهار ڪيو آهي. غربت بابت خيالن جو اظهار ڪندي وڏي وزير چيو ته صوبائي حڪومت 2023ع جي رپورٽ ۾ وڌندڙ غربت بابت حقيقتن کي سنجيدگي سان ورتو آهي. سنڌ حڪومت سماج جي پٺتي پيل طبقن جي مدد لاءِ ڪيترائي قدم کنيا آهن. 2022 جي ٻوڏ سبب بي گهر ٿيل 20 لک کان وڌيڪ متاثرين لاءِ هنگامي بنيادن تي گهر تعمير ڪرڻ جي رٿا ان سلسلي جي هڪ اهم ڪڙي آهي. موسمي اثرات کي نظر ۾ رکندي هي پروجيڪٽ جوڙيو ويو آھي، ھي رٿا ٻھراڙي وارن علائقن ۾ سماجي ۽ معاشي تبديليون آڻيندي. وڏي وزير جنهن وٽ ناڻي واري وزارت جو قلمدان پڻ آهي، واضح ڪيو ته حڪومت ضلعي انتظاميا کي ضروري شين جي اگھن تي ضابطو آڻڻ لاءِ متحرڪ ڪري ڇڏيو آهي. وفاقي حڪومت سان ويجهي رابطي سان ڪنزيومر پرائس انڊيڪس ۽ سينسٽو پرائس انڊيڪس کي گهٽائڻ جون ڪوششون جاري آھن. ورلڊ بئنڪ جي رپورٽ جو حوالو ڏيندي وڏي وزير سيد مراد علي شاهه چيو ته رپورٽ ۾ توانائي شعبي جي گردشي قرضن کي اجاگر ڪيو ويو آهي، جنهن سبب بجلي جا بل تمام گهڻا وڌي ويا آهن. سنڌ حڪومت وفاقي ادارن جي سهڪار سان بجلي چوري گهٽائڻ ۽ بقايا ادا ڪرڻ لاءِ ڪارروايون تيز ڪري ڇڏيون آهن. وڏي وزير چيو ته صوبائي حڪومت غريبن جي مالي سهولتن تائين رسائي واري مسئلي کي ختم ڪرڻ لاءِ سرگرم آهي. غربت جي خاتمي لاءِ پيپلز پاورٽي پروگرام تحت غريب سيڙپڪارن کي ٻڙي شرح سود تي قرض ڏنا پيا وڃن. پروگرام کي گلوبل ايگريڪلچرل ڊولپمينٽ فنڊ ۽ يورپي يونين جي مدد سان ننڍن ڪاروبارن ۽ جديد SMEs تائين وڌايو پيو وڃي. رپورٽ ۾ حڪومت جي مقامي قرضن ۾ واڌ تي خدشن جو اظهار ڪندي سيد مراد علي شاهه اجلاس ۾ شرڪت ڪندڙن کي مالياتي نظم و ضبط جو يقين ڏياريو. هن چيو ته جيتوڻيڪ مقامي سطح تي قرض وٺڻ جي اجازت هجڻ باوجود سنڌ گهڻو ڪري قرض وٺڻ کان پاسو ڪيو آهي، ان جي بدران اسان ٽيڪس سڌارن ذريعي روينيو وڌايو آهي. هن چيو ته سنڌ حڪومت ٻوڏ متاثر علائقن جي بحاليءَ لاءِ بين الاقوامي ترقياتي پارٽنرز کان تمام گهڻو قرض تمام گهٽ شرح تي ورتو آهي. وڏي وزير چيو ته سنڌ جي توانائي پاليسي ۾ به مقامي وسيلن مان بجلي پيدا ڪرڻ تي ڌيان ڏنو ويو آهي. نئين توانائي پاليسي جو اعلان جلد ڪيو ويندو. پاليسي تحت صوبي کي توانائي جي شعبي ۾ خودمختيار بڻائڻ لاءِ روايتي ۽ قابل تجديد ذريعن مان بجلي جي پيداوار ۾ مقامي ۽ عالمي سيڙپڪارن کي ترجيح ڏني ويندي. سيد مراد علي شاهه چيو ته اسان کي خبر آهي ته گذريل ڪجهه سالن کان خطو خاص ڪري سنڌ ڪيترن ئي چئلينجن کي منهن ڏئي رهي آهي. 2022ع واري ٻوڏ ۾ صوبي جو 70 سيڪڙو حصو ٻڏي ويو. انفراسٽرڪچر ۽ فصلن کي نقصان پهتو، سنڌ حڪومت لاءِ مختصر مدي اندر انفراسٽرڪچر بحال ڪرڻ هڪ چئلينج بڻجي ويو ھو. تقريب کي خطاب ڪندي رٿابندي ۽ ترقي واري صوبائي وزير ناصر حسين شاهه چيو ته سنڌ حڪومت وفاقي حڪومت جي ترقياتي رٿائن تي ٻين صوبن جي ڀيٽ ۾ وڌيڪ اثرائتي نموني عملدرآمد ڪري رهي آهي. رٿائن جي مڪمل ٿيڻ سان عوام کي فائدو ملڻ شروع ٿي ويو آهي. تقريب ۾ صوبائي وزيرن، ڊاڪٽر عذرا فضل پيچوهو، سعيد غني، سيد سردار شاهه، ڄام خان شورو، صلاحڪار نجمي عالم، وقار مهدي، صوبائي اسيمبلي جي ميمبرن، چيئرمين پي اينڊ ڊي نجم شاهه ۽ مختلف کاتن جي صوبائي سيڪريٽرين شرڪت ڪئي. ورلڊ بينڪ جون رپورٽس چيف اڪنامسٽ فار سائوٿ ايشيا مس فرانزيڪا اسڪاليز اينزورج ۽ ٻين خيالن جي ڏي وٺ ڪئي.
