ملاقات ۾ ٿر ڪول ريلوي لائين ۽ ايم ايل ون ريلوي لائين تي تفصيلي غور
ٿرڪول ريلوي لائين آڪٽوبر 2025 کان شروع ٿي ويندي. وفاقي سيڪريٽري ريلوي
ٿر جي ڪوئلي جي مڪمل صلاحيت جو استعمال ملڪ جي معيشت لاءِ فائديمند ثابت ٿيندو. آصف حيدر شاھ
ڪراچي
وفاقي سيڪريٽري ريلوي مظهر علي شاھ جي چيف سيڪريٽري سنڌ، آصف حيدر شاه سان ملاقات ڪئي، جنهن ۾ مختلف ريلوي جي منصوبن، بشمول ايم ايل 1 ۽ ٿر جي ڪوئلي جي ريلوي لائن تي تفصيلي گفتگو ڪئي وئي.
ملاقات ۾ سيڪريٽري ريلوي ٿر ڪوئلي جي ريلوي منصوبن جي اڳڀرائي بابت بريفنگ ڏيندي چيو ته هي منصوبو آڪٽوبر 2025 کان آپريشنل ٿي ويندو. هن وڌيڪ چيو ته ريلوي نيٽ ورڪ سالاني 10 ملين ٽن ڪوئلو منتقل ڪرڻ جي صلاحيت رکندو، جيڪو ملڪ جي پاور پروجيڪٽس کي سستي انرجي مهيا ڪرڻ ۾ مددگار ثابت ٿيندو.
چيف سيڪريٽري سنڌ، آصف حيدر شاه، ٿر ڪوئلي جي ريلوي لائن جي اهميت تي زور ڏيندي چيو ته هي لائن ٿر جي ڪوئلي کي پورٽ قاسم، لکي، ۽ ٻين بجلي گهرن تائين پهچائڻ ۾ مددگار ثابت ٿيندي. هن چيو ته ٿر ڪوئلي جي مڪمل صلاحيت جو استعمال ملڪ جي معيشت لاءِ فائديمند ثابت ٿيندو ۽ درآمد ٿيل ڪوئلي جي جڳهه تي مقامي ٿر ڪوئلي جي استعمال سان بجلي جي قيمتن ۾ گهٽتائي آڻيندو. چيف سيڪريٽري سنڌ ٻڌايو ته سنڌ حڪومت ٿر ڪوئلي جي ريلوي لائن لاءِ زمين مهيا ڪري رهي آهي، جنهن سان منصوبي جي بروقت مڪمل ٿيڻ کي يقيني بڻايو ويندو.
ملاقات ۾ سيڪريٽري ريلوي ٻڌايو ته ڪراچي کان حيدرآباد جي ايم ايل 1 پيڪيج تي پڻ جلد ڪم شروع ٿيندو. هن چيو ته هاءِ اسپيڊ ايم ايل 1 جي مڪمل ٿيڻ سان ملڪ جي ٽرانسپورٽ ۽ ڪارگو جي مسئلن کي حل ڪرڻ ۾ مدد ملندي. سيڪريٽري ريلوي ان ڳالهه تي پڻ زور ڏنو ته ايم ايل 1 جي اهميت کي نظرانداز نه ٿو ڪري سگهجي، ڇاڪاڻ ته هي پاڪستان جي ٽرانسپورٽ نظام کي جديد بڻائڻ ۾ هڪ اهم ڪردار ادا ڪندو. ملاقات ۾ سيڪريٽري توانائي، سينيئر ميمبر بورڊ آف ريونيو، ڊي ايس ريلوي ۽ ٻين لاڳاپيل آفيسرن پڻ شرڪت ڪئي.
