سنڌ جي سينئر وزير ۽ اطلاعات، ٽرانسپورٽ ۽ ماس ٽرانزٽ واري صوبائي وزير شرجيل انعام ميمڻ چيو آهي ته سنڌ حڪومت ممڪن سپر فلڊ جي خدشي کي نظر ۾ رکندي هنگامي قدم شروع ڪري ڇڏيا آهن۔ هن ٻڌايو ته سنڌ جي وڏي وزير پاڻ گڊو ۽ سکر بئراج سميت حساس بندن جو معائنو ڪيو آهي، جتي سپر فلڊ جي صورت ۾ نَوَ لک ڪيوسڪ پاڻيءَ جو دٻاءُ اچي سگهي ٿو۔ حڪومت جي پهرين ترجيح انساني جانن، مال مويشي ۽ بئراجن جي حفاظت آهي۔
هڪ بيان ۾ سينئر وزير شرجيل انعام ميمڻ چيو ته ضلعي انتظاميا، پي ڊي ايم اي، پاڪ نيوي ۽ پاڪ فوج ماڻهن جي انخلا ۽ رليف جي تيارين ۾ مصروف آهن، جڏهن ته ڪچي علائقن مان بروقت انخلا لاءِ 192 ٻيڙيون مقرر ڪيون ويون آهن۔
هن چيو ته ڪچي جي سڀني علائقن جو سروي مڪمل ٿي چڪو آهي ۽ آبادي، گهرن ۽ مال مويشيءَ جا نقشا ضلعي انتظاميا کي مهيا ڪيا ويا آهن۔ هزارين خاندانن کي محفوظ جڳهن، سرڪاري اسڪولن، عمارتن ۽ ٽينٽ سٽي ويلجز ڏانهن منتقل ڪرڻ جا انتظام مڪمل ڪيا ويا آهن، جڏهن ته رليف ڪيمپن ۾ کاڌي، پاڻي ۽ صحت جون سهولتون مهيا ڪيون پيون وڃن۔
هن وڌيڪ چيو ته سنڌ جي وڏي وزير سڀني حساس بندن تي فلڊ فائٽنگ جي رفتار تيز ڪرڻ ۽ ڪنهن به هنگامي صورتحال تي فوري ردعمل ڏيڻ جي هدايت ڪئي آهي۔ ڪي ڪي بند، شاهين بند، قادرپور، راونتي ۽ ٻين حساس هنڌن تي مشينري، پٿرن ۽ عملي جي مقرري ڪئي وئي آهي ۽ آفيسر 24 ڪلاڪ نگراني تي مقرر آهن۔
سينئر وزير شرجيل انعام ميمڻ چيو ته هي رڳو حڪومت يا انتظاميا جو نه پر اسان سڀني جو گڏيل امتحان آهي۔ هن چيو ته صدر آصف علي زرداري ۽ چيئرمين بلاول ڀٽو زرداري پاڻ صورتحال جي نگراني ڪري رهيا آهن، جڏهن ته پارٽي ڪارڪنن کي متاثرن جي مدد ڪرڻ جي هدايت ڏني وئي آهي۔
هن عوام ۽ ميڊيا کي اپيل ڪئي ته هو افواهون ۽ خوف ڦهلائڻ بدران انتظاميا سان سهڪار ڪن۔
