ڪراچي
سنڌ سرڪار جي چنگچي رڪشائن ۽ موٽرسائيڪل رڪشائن خلاف ڪريڪ ڊائون دوران، 311 چنگچي رڪشائن ۽ موٽرسائيڪل رڪشائن کي ضبط ڪري 311 ڊرائيورن کي گرفتار ڪيو ويو آهي.
سنڌ جي سينئر وزير ۽ اطلاعات، ٽرانسپورٽ ۽ ماس ٽرانزٽ واري صوبائي وزير شرجيل انعام ميمڻ هڪ بيان ۾ چيو آهي ته ڪراچي جي 11 ماڊل روڊن تي چنگچي رڪشائن ۽ موٽرسائيڪل رڪشائن خلاف ڪريڪ ڊائون 16 اپريل 2025 کان جاري آهي. سنڌ حڪومت جي هدايتن تي 9 اپريل 2025 تي شروع ٿيندڙ غير قانوني ۽ غير معياري ٽرانسپورٽ خلاف ڪريڪ ڊائون پڻ زور شور سان جاري آهي.
هن چيو ته ڪريڪ ڊائون دوران، فينسي نمبر پليٽن، ڪارن شيشن ۽ ٻين غير قانوني تبديلين خلاف پڻ ڪارروائي ڪئي وئي. ٽريفڪ ضابطن جي ڀڃڪڙي ڪرڻ تي 515 ڳري ۽ هلڪي ٽرانسپورٽ واريون گاڏيون ضبط ڪيون ويون.
سينئر وزير شرجيل انعام ميمڻ چيو ته 2025 مختلف خلاف ورزين تي 31,677 موٽرسائيڪلون ضبط ڪيون ويون، 25 گاڏين جي رجسٽريشن رد ڪرڻ جي سفارش ڪئي وئي، 491 گاڏين جي رجسٽريشن عارضي طور تي معطل ڪري مخصوص شرطن تي ڇڏيو ويو.
هن چيو ته ڪريڪ ڊائون ۾ سرڪاري حڪمن جي ڀڃڪڙي ڪرڻ تي پاڪستان پينل ڪوڊ جي سيڪشن 188 تحت 104 ايف آءِ آر درج ڪيون ويون آهن، تيز رفتاري ۽ لاپرواهي سان ڊرائيونگ ڪرڻ تي سيڪشن 279 تحت هڪ ايف آءِ آر درج ڪئي وئي آهي، ۽ عوامي رستي ۾ رنڊڪ وجھڻ تي سيڪشن 341 تحت 33 ڪيس داخل ڪيا ويا آهن. 23 غير رجسٽرڊ موٽرسائيڪل رڪشا پڻ ضبط ڪيا ويا.
شرجيل انعام ميمڻ چيو ته 32 غير قانوني ايل پي جي/سي اين جي ڪٽس ضبط ڪيون ويون، 7,069 گاڏين کي چالان جاري ڪيا ويا.
هن چيو ته ڪريڪ ڊائون جو مقصد شهرين کي هڪ محفوظ، منظم ۽ قانون جي پاسداري ڪندڙ ٽرانسپورٽ جو نظام فراهم ڪرڻ آهي. چنگچي رڪشا ۽ غير رجسٽرڊ موٽرسائيڪل رڪشا ٽريفڪ جي وهڪري ۾ خلل وجهي رهيا هئا ۽ عوام جي جان ۽ مال لاءِ خطرو بڻجي رهيا هئا.
سينئر وزير شرجيل انعام ميمڻ چيو ته اسين غير قانوني تبديلين ۽ ٽرئفڪ ضابطن جي ڀڃڪڙي خلاف زيرو ٽالرنس پاليسي تي قائم آهيون، ۽ ڪنهن کي به روڊن تي لاقانونيت ڪرڻ جي اجازت نه آهي.
هن چيو ته اسين چاهيون ٿا ته سڀ گاڏيون ٽرانسپورٽ کاتي وٽ رجسٽرڊ هجن، انهن وٽ فٽنيس سرٽيفڪيٽ هجي، ۽ ڊرائيور مڪمل طور تي تربيت يافته ۽ لائسنس يافته هجن. شهري غير قانوني گاڏين ۾ سفر ڪرڻ کان پاسو ڪن ۽ اختيارين کي خلاف ورزين بابت رپورٽ ڪن.
