ڪراچي،
سنڌ جي توانائي واري وزير ناصر حسين شاهه چيو آهي ته چيئرمين بلاول ڀٽو زرداري جي ويزن مطابق سنڌ ۾ سستي ۽ گرين انرجي جي فراهمي اسان جي پهرين ترجيح آهي. سنڌ حڪومت صوبي ۾ ونڊ ۽ سولر جي ڪيترن ئي منصوبن تي ڪم ڪري رهي آهي.
اهو بيان هن ڊي ايڇ اي سٽي جي ايڊمنسٽريٽر بريگيڊيئر سهيل جي اڳواڻي ۾ ملندڙ وفد سان گڏ ٿيل اجلاس دوران ڏنو. اجلاس ۾ توانائي واري سيڪريٽري مصدق خان، ايس ٽي ڊي سي جو سي اي او سليم شيخ، سنڌ سولر پروجيڪٽ جو ڊائريڪٽر قاضي محفوظ، ٿر ڪول بورڊ جو ايم ڊي طارق علي شاهه ۽ ٻيا آفيسر پڻ شريڪ ٿيا.
وفد 113 ميگاواٽ بجلي کي گرين انرجي ۾ تبديل ڪرڻ ۽ ڊي ايڇ اي سٽي ۽ اڪنامڪ زون کي گرين انرجي ذريعي بجلي فراهم ڪرڻ ۾ دلچسپي ظاهر ڪئي.
ناصر حسين شاهه چيو ته پرڏيهي ۽ مقامي سيڙپڪار گرين انرجي جي منصوبن ۾ دلچسپي ڏيکاري رهيا آهن، ۽ چيني ڪمپنين ۽ مقامي سيڙپڪارن سان ايم او يو تي صحيحون ٿي رهيون آهن. هن وڌيڪ چيو ته صوبي ۾ لڳايل منصوبن جو ٽيرف سپرا طئي ڪندو، جيڪو نيپرا جي ٽيرف کان ڪافي گهٽ آهي.
هن وڌيڪ ٻڌايو ته سنڌ ٽرانسميشن اينڊ ڊسپيچ ڪمپني نوري آباد ونڊ پاور مان 100 ميگاواٽ سستي بجلي ڪي اليڪٽرڪ کي فراهم ڪري رهي آهي. هن يقين ڏياريو ته سنڌ حڪومت گرين انرجي تي ڪم ڪندڙ ڪمپنين کي مڪمل سهولتون فراهم ڪندي.
توانائي واري سيڪريٽري مصدق خان وفد کي ٽيرف ۽ ٽرانسميشن بابت تفصيل سان آگاهه ڪيو.
