ايراني قونصل جنرل حسن نورين جي ميزباني ۾ ربيع الاول جي مهيني جي حوالي سان ايراني قونصليٽ ڪراچي ۾ ھڪ تقريب ڪوٺائي وئي، تقريب ۾ سنڌ جي سينيئر وزير شرجيل انعام ميمڻ، صوبائي وزيرن سيد ناصر حسين شاهه، سعيد غني، سيد مراد علي شاهه ۽ ٻين شرڪت ڪئي. ذوالفقار شاهه ۽ ٻيا موجود هئا.
تقريب کي خاص مهمان طور خطاب ڪندي سينيئر صوبائي وزير شرجيل انعام ميمڻ چيو ته ربيع الاول جو مهينو اسان جي پياري نبي حضرت محمد صلي الله عليه وآله وسلم جي ولادت جو ڏهاڙو آهي هن تقريب ۾ شرڪت منهنجي لاءِ اعزاز آھي.
هن چيو ته شفقت، انصاف ۽ اتحاد تي ٻڌل اسان جي پياري نبي حضرت محمد صلي الله عليه وآله وسلم جي تعليمات اسان لاءِ مشعل راهه آهي.
هن چيو ته پاڪستان ۽ ايران جا گھرا ۽ جٽادار لاڳاپا ھڪجھڙي ورٽي، گڏيل احترام ۽ سھڪار تي ٻڌل آهن. ثقافتي طور تي، ايران ۽ پاڪستان ھڪجھڙين روايتن، ادب ۽ فن جي هڪ امير ورثي ۾ ڳتيل آهن.
سينيئر وزير شرجيل انعام ميمڻ چيو ته فن، موسيقي ۽ ادب ذريعي اسان جي ماڻهن جو گڏيل تجربو باهمي فھم کي ھٿي ڏئي ٿو. اڄوڪي تقريب اسان کي نبي ڪريم صلي الله عليه وآله وسلم جي تعليمات ۽ عملي زندگي تي عمل ڪرڻ ۽ ثقافتي لاڳاپن کي ھٿي ڏيڻ جو موقعو فراهم ڪري ٿي.
هن چيو ته فني اظهار ۽ تعليمي قدمن کي هٿي وٺرائڻ سان اسان گڏيل مفاھمت ۽ احترام کي سگھارو بڻائي سگھون ٿا. اسان فوڊ سيڪيورٽي ۽ جٽادار ترقي جي شعبن ۾ عالمي للڪارن کي منهن ڏئي رهيا آهيون، پاڪ-ايران سھڪار نه رڳو ٻه طرفي پر علائقائي استحڪام کي ھٿي ڏيڻ لاءِ به ضروري آهي. زرعي مھارتن، وسيلن جي مٽاسٽا ۽ جديد حڪمت عملين سان غذائي کوٽ جي للڪارن کي منهن ڏئي سگهجي ٿو.
هن چيو ته ڊائيلاگ ۽ سھڪار جي ذريعي، اسان بهتر اقتصادي شراڪتداري، ثقافتي مٽاسٽا ۽ گڏيل سھڪار تي ٻڌل قدم کڻي سگھون ٿا. ھڪٻئي سان سھڪار جو درس اسان جي نبي ڪريم صلي الله عليه وآله وسلم ڏنو آهي، اسان گڏجي درپيش للڪارن کي منهن ڏئي سگهون ٿا، اڄوڪي ڏينهن اسان کي پاڪ ايران لاڳاپن کي وڌيڪ مضبوط بڻائڻ جي عزم جي تجديد ڪرڻ گهرجي.
