ڪراچي: سنڌ جي سينئر وزير ۽ اطلاعات، ٽرانسپورٽ ۽ ماس ٽرانزٽ جي صوبائي وزير شرجيل انعام ميمڻ چيو آهي ته سنڌ سرڪار ٻوڏ واري صورتحال تي نظر رکيون ويٺي آهي ۽ هر سطح تي هڪ گڏيل حڪمت عملي تي ڪم ڪيو پيو وڃي.
هڪ بيان ۾، سنڌ جي سينئر وزير شرجيل انعام ميمڻ چيو ته سنڌ حڪومت ۽ سمورا کاتا ڏينهن رات نگراني ۽ امدادي سرگرمين ۾ مصروف آهن، بئراجن ۽ دريائن تي پاڻي جي سطح کي لڳاتار چيڪ ڪيو پيو وڃي ته جيئن وقت کان اڳ احتياطي اپاءَ ورتا وڃن. ڪچي جي متاثر علائقن ۾ ماڻهن کي محفوظ هنڌن تي منتقل ڪيو ويو آهي، عارضي رهائش، پيئڻ جو پاڻي، کاڌو، دوائون ۽ ٻيون ضروري سهولتون فراهم ڪيون ويون آهن.
هن چيو ته هي هڪ قومي ايمرجنسي آهي جنهن کي حڪومت اڪيلي سر منهن نٿي ڏئي سگهي، ان لاءِ عوام جو سھڪار تمام ضروري آهي، ماڻهن کي انتظاميه ۽ بچاءُ وارن ادارن جي هدايتن تي عمل ڪرڻ گهرجي، افواهن کان پاسو ڪرڻ گهرجي ۽ ڪنهن به ايمرجنسي ۾ ويجهي مرڪز يا هيلپ لائن سان رابطو ڪرڻ گهرجي.
شرجيل انعام ميمڻ چيو ته سنڌ جو وڏو وزير ۽ ٻيا ڪابينا ميمبر ذاتي طور تي انهن آپريشن جي نگراني ڪري رهيا آهن ۽ متاثر علائقن جو دورو پڻ ڪري رهيا آهن. سنڌ حڪومت جو مقصد رڳو عارضي امداد ڏيڻ نه پر متاثر علائقن جي بحالي ۽ مستقبل ۾ اهڙي صورتحال کي روڪڻ لاءِ مستقل قدم کڻڻ آهي.
هن چيو ته ٽرمو تي پاڻي جي سطح گهٽجي وئي آهي، پنجند تي وڏي درجي واري ٻوڏ آهي، جڏهن ته گڊو ۽ سکر بئراج تي وچولي درجي جي ٻوڏ آهي ۽ ڪوٽڙي تي گهٽ درجي واري ٻوڏ آهي.
سينئر وزير شرجيل انعام ميمڻ چيو ته گذريل 36 ڪلاڪن دوران ڪچي جي علائقن مان 2375 ماڻهن کي محفوظ هنڌن تي منتقل ڪيو ويو آهي، هاڻي تائين ڪل 150002 ماڻهن کي منتقل ڪيو ويو آهي، 8389 ماڻهن کي 169 فڪسڊ ۽ موبائل هيلٿ سائيٽس تي طبي سهولتون فراهم ڪيون ويون آهن، ھن وقت تائين ڪل 63748 ماڻهن کي طبي سهولتون فراهم ڪيون ويون آهن. هن چيو ته گذريل 36 ڪلاڪن ۾ 11,844 ڍورن کي محفوظ هنڌن تي منتقل ڪيو ويو آهي. هاڻي تائين ڪل 410,951 ڍورن کي محفوظ هنڌن تي منتقل ڪيو ويو آهي. 49,303 ڍورن کي ويڪسين ۽ علاج ڪيو ويو آهي. هينئر تائين، ڪل 1,080,694 ڍورن کي ويڪسين ۽ علاج ڪيو ويو آهي.
