ڪراچي سنڌ جي وڏي وزير سيد مراد علي شاهه سندس حڪومت جي ان عزم کي ورجايو آهي ته سنڌ پوليس کي هڪ مضبوط ٽيڪنالاجيءَ تي ٻڌل فورس ۾ تبديل ڪيو وڃي ته جيئن عوام جي حفاظت کي وڌايو وڃي ۽ سنڌ جي عوام ۾ قانون لاڳو ڪندڙ ادارن تي اعتماد پيدا ڪيو وڃي. هن اها ڳالهه اڄ وزيراعليٰ هائوس ۾ اسسٽنٽ سپرنٽينڊنٽ آف پوليس (ASPs) جي 51 هين اسپيشل ٽريننگ پروگرام ۽ 27 هين شروعاتي ڪمانڊ ڪورس جي شرڪت ڪندڙن کي خطاب ڪندي چئي. اجلاس ۾ چيف سيڪريٽري آصف حيدر شاهه، گهرو سيڪريٽري اقبال ميمڻ، وڏي وزير جو پرنسپل سيڪريٽري آغا واصف، آءِ جي پوليس غلام نبي ميمڻ ۽ ٻين شرڪت ڪئي. وڏي وزير چيو ته 1843ع ۾ قائم ڪيل سنڌ پوليس ننڍي کنڊ جو سڀ کان پراڻو پوليس ادارو آهي ۽ موجوده قانون لاڳو ڪندڙ ادارن جي چيلنجن کي منهن ڏيڻ لاءِ جديد مرحلن مان گذري رهيو آهي. هن چيو ته 162000 اهلڪارن جي منظور ٿيل سنڌ پوليس پاڪستان جي ٻئين وڏي فورس آهي جيڪا ڏوهن جي روڪٿام، ڳولا ڪرڻ ۽ امن امان جي بحالي جي ذميوار آهي. وڏي وزير پوليس فورس جي صلاحيت ۽ ڪارڪردگي کي وڌائڻ لاءِ ڪيترن ئي اهم قدمن تي خيالن جي ڏي وٺ ڪئي. هن چيو ته سنڌ ۾ هڪ وڏو منصوبو سمارٽ سرويلنس سسٽم (S4 پروجيڪٽ) هو جنهن ۾ سڄي صوبي جي 40 ٽول پلازن تي نگراني لاءِ ڪيمرا لڳائڻ شامل آهن. هن چيو ته سسٽم جو مقصد اچ وڃ جي اهم پوائنٽن تي وقت سر نگراني ڪرڻ، جوابي ڪارروائي کي بهتر بڻائڻ آهي جڏهن ته جديد انٽيليجنس ٽولز کي استعمال ڪندي پوليس آپريشن کي منظم ڪرڻ آهي. وڏي وزير موجب ڪراچي سيف سٽي پروجيڪٽ سنڌ پوليس جي صلاحيتن ۾ نمايان اضافو ڪرڻ لاءِ ٺاهيو ويو آهي جيڪو پاڪستان جي سڀ کان وڏي شهر ۾ عوام جي حفاظت کي يقيني بڻائيندو. ڏوهن جي خلاف حڪومتي ڪوششن جو ذڪر ڪندي وڏي وزير سنڌ هيبيچوئل آفينڊرز مانيٽرنگ ايڪٽ 2022 جو ذڪر ڪيو جنهن تحت اسٽريٽ ڪرائيم جهڙوڪ ڦرلٽ، ڀتاخوري ۽ گاڏين جي چوري ۾ ملوث ڏوهارين کي اليڪٽرانڪ ٽيگنگ جي اجازت ڏني وئي آهي
هن چيو ته جي پي ايس ڪنگڻ ذريعي سڄي صوبي ۾ ڏوهارين جي حقيقي وقت مانيٽرنگ کي فعال بڻائي سگهندا. پوليس کاتي لاءِ بجيٽ مختص ڪرڻ بابت ڳالهائيندي وڏي وزير چيو ته پوليس فورس ۾ کاتن کي مضبوط ڪرڻ لاءِ خاص فنڊ رکيا ويا آهن. هن چيو ته ڪائونٽر ٽيررازم ڊپارٽمينٽ (سي ٽي ڊي) کي 2 ارب 7 ڪروڙ رپيا، اسپيشل برانچ کي هڪ ارب 2 ڪروڙ رپيا ۽ انويسٽيگيشن برانچ کي 60 ڪروڙ رپيا جاچ خرچن لاءِ مليا آهن. ۽ وڌيڪ چيو ته تحقيقاتي آفيسرن (IOs) لاءِ مراعتون شامل ڪيون ويون آهن جيڪي سزائون محفوظ ڪن ٿا. پوليس اسٽيشنن لاءِ اٽڪل 6 ارب رپيا مختص ڪيا ويا آهن، هاڻي اسٽيشن هائوس آفيسرن (SHOs) کي ڊرائنگ اينڊ ڊسبرسنگ آفيسر (DDOs) طور بااختيار بڻايو ويو آهي. پوليس اهلڪارن ۽ انهن جي خاندانن جي مدد لاءِ سنڌ حڪومت 4 ارب 9 ڪروڙ 61 رک رپين جو هيلٿ انشورنس پروگرام متعارف ڪرايو آهي. وڏي وزير چيو ته شهيد پيڪيج تي عمل ڪيو ويو آهي جنهن ۾ معاوضو 10 ملين مان وڌائي 23 ملين رپيا ڪيو ويو آهي، ريٽائرمينٽ جي عمر تائين مسلسل پگهارن جي ادائيگي کي يقيني بڻايو ويو آهي ۽ شهيدن جي وارثن کي ٻه نوڪريون ڏنيون وينديون. سنڌ پوليس ۾ مهارت جي اهميت بابت ڳالهائيندي وڏي وزير چيو ته سندس حڪومت پوليس آفيسرن، پراسيڪيوٽرن ۽ ججن لاءِ تربيتي پروگرامن ۾ سيڙپڪاري ڪري رهي آهي ته جيئن قانونن ۽ پاليسين تي موثر عمل درآمد کي يقيني بڻائي سگهجي. هن وڌيڪ چيو ته اهلڪارن کي جديد چئلينجن لاءِ تيار ڪرڻ ۽ امن امان کي برقرار رکڻ لاءِ صلاحيت وڌائڻ جا قدم جاري آهن. وڏي وزير چيو ته سنڌ حڪومت جو جامع انداز سنڌ پوليس کي هڪ جديد، موثر ۽ ٽيڪنالاجيءَ سان ڀريل فورس ۾ تبديل ڪرڻ جي عزم جو عڪاسي آهي. ۽ وڌيڪ چيو ته انهن قدمن سان عوام جي حفاظت کي بهتر بڻائڻ ۽ سنڌ جي عوام ۾ قانون لاڳو ڪندڙ ادارن تي اعتماد وڌائڻ آهي. جاري سڌارن ۽ سيڙپڪاري سان سنڌ پوليس پاڪستان ۾ هڪ ماڊل قانون لاڳو ڪندڙ ادارو بڻجي رهيو آهي.
